ខេត្តតាកែវ៖ កាលពីពេលថ្មីៗនេះ ទឹកដក់នៅភ្នំចំបាប់ ឃុំត្នោត ស្រុកបាទី ខេត្តតាកែវ ដែលកើតចេញពីកាយយកថ្ម បានក្លាយជាកន្លែងគួរឱ្យចាប់អារម្មណ៍ថ្មីមួយ ដែលមនុស្សជាច្រើនបានទៅងូតលេងទាំងមិនបានដឹងថាទឹកនោះ វាយ៉ាងម៉េច? មានសារធាតុអ្វី ? ឬ ការក៏អាចបង្កហានិភ័យយ៉ាងណានោះទេ ។
បើតាមទំព័រហ្វេសប៊ុកផេក តាកែវ ស្រុកកំណើតខ្ញុំ បានប្រាប់ឱ្យដឹងថា ពេលនេះអាជ្ញាធរកំពុងធ្វើការពិសោធន៍ទឹកនៅទីនោះ ដោយរង់ចាំការបញ្ជាក់ពីអាជ្ញាធរជាមុនសិនថា ទឹកនោះមានសារធាតុអ្វី ? ហេតុដូច្នេះ សូមប្រជាពលរដ្ឋ កុំអាលលេងទឹកនេះ ឬប្រេីប្រាស់ទឹកនេះអី ចៀសវាងករណីមានបញ្ហាដល់សុខភាពស្បែក និងមានជំងឺផ្សេងៗ ដោយសារទឹកនេះដក់ក្នុងតំបន់ដែលគេកាយថ្មភ្នំ មិនមែនជាទឹកបឹង ទឹកជ្រោះធម្មជាតិនោះទេ។ បច្ចុប្បន្ននេះ មានមនុស្សជាច្រើនសម្រុកទៅងូតទឹកនៅភ្នំចំបាប់ខេត្តតាកែវនេះ លេងជារាល់ថ្ងៃ។
គេនៅចាំថា កាលពីមុន ករណីដូចគ្នានេះធ្លាប់មាននៅ ភ្នំខ្លែងពណ៌ស្ថិតក្នុងខេត្តបន្ទាយមានជ័យដែរ ដែលទឹកមានពណ៌ខៀវដូចទឹកសមុទ្រ ដែលធ្វើឱ្យមនុស្សជាច្រើនទៅងូតលេងជាហូរហែ តែក្រោយមកក៏ត្រូវបានអាជ្ញាធរហាមឃាត់ក្រោយរកឃើញថា ក្នុងទឹកមានផ្ទុកសារធាតុគីមីដែលអាចធ្វើឱ្យប៉ះពាល់សុខភាពយ៉ាងធ្ងន់ធ្ងរ ប្រសិនបើងូតលេង ៕
