កប់ហ្មង! ទុរេន ៧តោន ឱ្យញ៉ាំដោយឥតគិតថ្លៃ ក្នុងថ្ងៃទិវាពលកម្មអន្តរជាតិ នៅប្រទេសថៃ

ថៃ៖ មនុស្សរាប់ពាន់នាក់បានចូលរួមយ៉ាងច្រើនកុះករនៅវត្ត ថាមៃ (Thamai) ក្នុងខេត្តសាមុត សាខន (Samut Sakhon) នៃភាគខាងលិចទីក្រុងបាងកក ដើម្បីមកញ៉ាំទុរេនដោយឥតគិតថ្លៃចំនួន ៧តោន ដែលវត្តនេះ បានរៀបចំសម្រាប់ពលករនៅថ្ងៃទិវាពលកម្មអន្តរជាតិ។

ចំណែកឯខាងក្រៅបរិវេណវត្តវិញ មានការកកស្ទះចរាចរយ៉ាងខ្លាំងមានចម្ងាយរហូតដល់ទៅ ៣គីឡូម៉ែត្រឯណោះ ខណៈដែលពិធីមួយនេះ ត្រូវបានរៀបចំចាប់ពីម៉ោង ៩ព្រឹក ដើម្បីថ្វាយគុណូបការៈទៅដល់អតីតព្រះមហាក្សត្រថៃ Bhumibol Adulyadej (Rama IX) និងព្រះមហាក្សត្រថ្មី Maha Vachiralongkorn ។ បន្ទាប់ពីពិធីសម្រាប់អតីតព្រះមហាក្សត្រថៃ និងមហាក្សត្រថ្មីនេះចប់សព្វគ្រប់ ទុរេនដែលបានពុះរួចជាស្រេចជាច្រើន និងអ្នកស្ម័គ្រចិត្តបានចែកផ្លែឈើបន្លែ និងអាហារសម្រន់ផ្សេងៗដល់អ្នកដែលចូលរួម។ ក្នុងនោះដែរ អ្នកខ្លះបានមករង់ចាំតាំងពីម៉ោង ៥ ព្រឹក។

គួរបញ្ជាក់ផងដែរ ទុរេនចំនួន៧តោននេះ បានមកពីចម្ការនៅក្រុង រ៉ាយ៉ង (Rayong) និង ចាន់ថាបុរី (Chanthaburi) ហើយក៏មានទុរេនដែលមិនទាន់ពុះទុកត្រៀមសម្រាប់ភ្ញៀវ ក្នុងករណីចំនួនខាងលើមិនទាន់គ្រប់គ្រាន់ទៀតផង៕ ប្រភព៖ thethaiger