កោះកុង ៖ កាលពីថ្ងៃទី៦ ខែឧសភានេះ លោកស្រី មិថុនា ភូថង ជាអភិបាលនៃគណៈអភិបាលខេត្តកោះកុង បានបញ្ចេញសារអំពាវនាវតាមរយៈហ្វេសប៊ុកផ្លូវការមានឈ្មោះ Mithona Phouthorng កុំឲ្យជនខិលខូច កាប់ទន្ទ្រានព្រៃ នៅក្នុងតំបន់ហាមឃាត់ នៅក្នុងខេត្តកោះកុង តទៅទៀត។
នៅក្នុងសារនោះ អ្នកស្រីបានបញ្ជាក់យ៉ាងដូច្នេះថា៖ ‹‹នាងខ្ញុំ សូមជម្រាបជូនដំណឹងដល់ពូមីង បងប្អូនប្រជាពលរដ្ឋទាំងអស់មេត្តាជ្រាបថា កន្លងមកមានជនខិលខូចមួយចំនួនបានលួចចូលកាប់ទន្ទ្រានដីព្រៃរបស់រដ្ឋ នៅក្នុងតំបន់ហាមឃាត់យកធ្វើជាកម្មសិទ្ធិផ្ទាល់ខ្លួន នោះគឺជាអំពើល្មើសច្បាប់។ អាស្រ័យហេតុនេះ សូមពូមីង បងប្អូនប្រជាពលរដ្ឋទាំងអស់ មេត្តាបញ្ឈប់ជាបន្ទាន់នូវសកម្មភាពកាប់ទន្ទ្រានដីព្រៃរបស់រដ្ឋធ្វើជាកម្មសិទ្ធិ ឬលក់ឱ្យអ្នកដទៃ។
សូមពូមីង បងប្អូនទាំងអស់មេត្តាកុំចាញ់ល្បិចញ៉ុះញ៉ុង បោកបញ្ឆោតរបស់ជនឆ្លៀតឱកាសមួយចំនួនដែលចង់បានប្រយោជន៍ផ្ទាល់ខ្លួន។ បើមិនដូច្នោះទេ ពូមីង បងប្អូន នឹងត្រូវប្រឈមមុខជាមួយច្បាប់ជាធរមាន។
នាងខ្ញុំសង្ឃឹមថា ពូមីង បងប្អូនប្រជាពលរដ្ឋទាំងអស់នឹងបញ្ឈប់នូវសកម្មភាពកាប់ទន្ទ្រានដីរដ្ឋដោយខុសច្បាប់ និងមិនបន្តចាញ់ល្បិចបោកប្រាស់ញ៉ុះញ៉ុងរបស់ជនខិលខូចឆ្លៀតឪកាសទៀតឡើយ។
#កោះកុង #kohkong #cambodia››៕ ប្រភព៖ ហ្វេសប៊ុក
