ខេត្តព្រះសីហនុ៖ គួររំលឹកឡើងវិញបន្តិច ដើម្បីតាមស្វែងរកចាប់ខ្លួន ជនជាតិចិនមួយក្រុម ដែលបានបង្ហោះវីដេអូស្រែកគំរាមថា ពួកគេមកពីខេត្តឆុងឆីង ចង់បង្កអសន្ដិសុខ នៅខេត្តព្រះសីហនុ ពេលនេះកម្លាំងនគរបាលខេត្តព្រះសីហនុ សហការជាមួយនាយកដ្ឋានជំនាញដែលពាក់ព័ន្ធ កំពុងបើកប្រតិបត្តិការយ៉ាងក្ដៅគគុក។ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ ថ្លែងប្រាប់អង្គភាព Fresh News ឲ្យដឹងនៅព្រឹកថ្ងៃទី១២ ខែឧសភា ឆ្នាំ២០១៩នេះថា
បន្ទាប់ពីទទួលបានបទបញ្ជាយ៉ាងម៉ឺងម៉ាត់ ពីនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិនោះ លោកបានបញ្ជាកម្លាំងជំនាញបើកការស្រាវជ្រាវភ្លាមៗជាបន្ទាន់ ។បើតាមលោកឧត្តមសេនីយ៍ស្នងការ រហូតមកដល់ពេលនេះ កម្លាំងជំនាញនៃស្នងការដ្ឋាននគរបាលខេត្ត កំពុងសហការជាមួយនាយកដ្ឋានជំនាញពាក់ព័ន្ធ បើកប្រតិបត្ដិការយ៉ាងក្ដៅគគុក
ដើម្បីស្រាវជ្រាវ និងឈានដល់ការចាប់ខ្លូនជនជាតិចិនមួយក្រុមខាងលើ ដែលបង្ហោះវីដេអូស្រែកគំរាមចង់បង្កអសន្ដិសុខ នៅខេត្តព្រះសីហនុ ។ប៉ុន្ដែទោះជាយ៉ាងណាក៏ដោយ លោកឧត្តមសេនីយ៍ទោ ជួន ណារិន្ទ មិនទាន់អាចបញ្ជាក់ច្បាស់ថា ជនជាតិចិនដែលបង្ហោះវីដេអូនោះ ស្នាក់នៅ ឬក៏ធ្វើការនៅខេត្តព្រះសីហនុនោះទេ ពោលស្ថិតនៅក្រោមការស្រាវជ្រាវនៅឡើយ ។បើយោងតាមមន្ដ្រីជាន់ខ្ពស់ នៃអគ្គស្នងការដ្ឋាននគរបាលជាតិ
បានអះអាងថា តាមរយៈវីដេអូឃ្លឹបរបស់ជនជាតិចិនមួយក្រុមនេះ ដែលបកប្រែជាភាសាខ្មែរថា «ពួកគេមកពីខេត្តឆុងឆីង ហើយនិយាយទៀតថា កំពង់សោម៣ឆ្នាំក្រោយវាចង់ឲ្យវឹកវរ គឺវឹកវរចង់ឲ្យសុវត្ថិភាព គឺសុវត្ថិភាពនោះ» ត្រូវបាននាយឧត្តមសេនីយ៍ សន្ដិបណ្ដិត នេត សាវឿន អគ្គស្នងការនគរបាលជាតិ បានបញ្ជាឲ្យកម្លាំងនាយកដ្ឋានជំនាញ សហការជាមួយស្នងការដ្ឋាននគរបាលខេត្តព្រះសីហនុ ស្រាវជ្រាវភ្លាម ហើយរកឃើញត្រូវចាត់វិធានការច្បាប់ជាបន្ទាន់ ឬត្រូវបណ្ដេញចេញពីកម្ពុជាផងដែរ។
កាលពីយប់ម្សិលមិញនេះថ្ងៃទី១៣ ខែឧសភា ឆ្នាំ២០១៩ តាមរយៈពេលហ្វេសប៊ុកផ្លូវការរបស់ស្ថានទូតចិនប្រចាំនៅកម្ពុជា បានបង្ហោះសារមួយដោយបានបញ្ជាក់ថា៖ ‹‹ស្ថានទូតសាធារណរដ្ឋប្រជាមានិតចិនប្រចាំកម្ពុជា បង្ហាញការយកចិត្តទុកដាក់ខ្ពស់ចំពោះវីដេអូជនជាតិចិនសង្ស័យពាក់ព័ន្ធនឹងសង្គមងងឹតដែលត្រូវបានផ្សព្វផ្សាយតាមបណ្ដាញសង្គមក្នុងពេលថ្មីៗនេះ បុរសជាងដប់នាក់ដែលហៅខ្លួនឯងជាជនជាតិចិនមកពីទីក្រុងchongqing បានបង្ហោះវីដេអូខ្លីមួយពាក់ព័ន្ធនឹងសកម្មភាពសង្គមងងឹត និយាយយ៉ាងក្អេងក្អាងថានឹងបំពុលដល់សន្តិសុខនៅខេត្តព្រះសីហនុ។ ស្ថានទូតចិនប្រចាំកម្ពុជាមានការយកចិត្តទុកដាក់ខ្ពស់ចំពោះបញ្ហានេះ និងបានជួយសម្របសម្រួលដល់សមត្ថកិច្ចនៃប្រទេសចិន និងកម្ពុជា ដេីម្បីបេីកការស៊េីបអង្កេតអោយបានគ្រប់ជ្រុងជ្រោយលេីបញ្ហាមួយនេះ។ ជឿជាក់ថាការពិតនៃបញ្ហានេះនឹងត្រូវបានលាតត្រដាងក្នុងពេលឆាប់ៗ ករណីមានការវិវត្តន៍អ្វីថ្មី យេីងខ្ញុំនឹងធ្វេីការប្រកាសជូនដំណឹងបន្តទៀតអោយបានទាន់ពេល››៕
វីដេអូ៖
