ភ្នំពេញ៖ នៅវេលាម៉ោងជាង១យប់រំលងអធ្រាត្រឈានចូល ថ្ងៃទី១៧ ខែឧសភា ឆ្នាំ២០១៩ មានហេតុការណ៍គ្រោះថ្នាក់ចរាចរមួយបានកើតឡើង ស្ថិតនៅតាមបណ្ដោយផ្លូវជាតិលេខ១ ក្នុងសង្កាត់វាលស្បូវ ខណ្ឌច្បារអំពៅ រាជធានីភ្នំពេញ។ ហេតុការណ៍នេះបង្កឡើងដោយរថយន្តមួយគ្រឿងបុករះរ៉ឺម៉កកង់បី បេុីង ក្រឡាប់ ស្លាប់ស្ត្រីម្នាក់ រងរបួសធ្ងន់ ស្រាល មនុស្ស៤នាក់នៅផ្លូវជាតិលេខ១។
សពស្ត្រីរងគ្រោះមានឈ្មោះ ភោគ នៅ អាយុ៣៨ឆ្នាំ មុខរបរជាបុគ្គលិករោងចក្រ និងមានទីកន្លែងកំណើតស្ថិតនៅភូមិសាលារៀន ឃុំបាសាក់ ស្រុកស្វាយជ្រុំ ខេត្តស្វាយរៀង។ បន្ទាប់ពីគ្រោះថ្នាក់ ជនរងគ្រោះទាំង៤នាក់ខាងលើត្រូវបានរថយន្តសង្គ្រោះបន្ទាន់ ដឹកយកទៅសង្គ្រោះភ្លាមៗ នៅឯមន្ទីរពេទ្យ។
តាមប្រភពព័ត៌មានបានឱ្យដឹងថា នៅមុនពេលកើតហេតុគេឃើញរថយន្តមួយគ្រឿងម៉ាក TOYOTA PRIUS ពណ៌ស ពាក់ស្លាកភ្នំពេញ 2AL04-27 បានធ្វើដំណើរតាមបណ្ដោយផ្លូវជាតិលេខ១ ក្នុងទិសដៅពីលិចទៅកើត ក្នុងល្បឿនយ៉ាងលឿន ក៏ជ្រុលទៅបុករះរ៉ឺម៉កកង់បីចំនួន២គ្រឿង ដែលកំពុងតែធ្វើដំណើរតាមបណ្ដោយផ្លូវជាតិលេខ១ ក្នុងទិសដៅពីកើតទៅលិច ចំពេញមួយទំហឹងលាន់ដូចរន្ទះ បណ្ដាលឱ្យស្ត្រីម្នាក់ស្លាប់ភ្លាមៗ នៅនឹងកន្លែងកើតហេតុយ៉ាងអាណោធអាធ័ម ចំណែកឯមនុស្ស៤នាក់ទៀត រួមទាំងក្មេងស្រីតូចម្នាក់ ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះភ្លាមៗ នៅឯមន្ទីរពេទ្យផងដែរ។បន្ទាប់ពីកើតហេតុភ្លាមៗ អ្នកបើកបររថយន្តបង្ក បានរត់គេចខ្លួនបាត់ស្រមោលតែម្តង។
សពស្ត្រីរងគ្រោះ ត្រូវក្រុមគ្រួសារដឹកយកទៅធ្វើបុណ្យតាមប្រពៃណីនៅឯស្រុកកំណើត។ ចំណែករ៉ឺម៉កកង់បីទាំងពីរ រួមទាំងរថយន្តបង្កត្រូវសមត្ថកិច្ចជំនាញ ចុះវាស់វែង យកទៅរក្សាទុក នៅការិយាល័យចរាចរណ៍ផ្លូវគោក ដើម្បីរង់ចាំដោះស្រាយគ្នា ទៅតាមផ្លូវច្បាប់នៅពេលក្រោយផងដែរ៕ ប្រភព៖ ហ្វេសប៊ុក
