ក្រោយស្ពានអ្នកលឿង ឬស្ពានត្សឹបាសា ដែលជាអំណោយរបស់ជប៉ុនជូនកម្ពុជា បានរងការខូចខាតជាខ្លាំង ដោយសារមានអ្នកជិះរថយន្តបុកមួយទំហឹងរហូតបាក់បែកបង្កាន់ដៃដល់ថ្នាក់ពលរដ្ឋដែលបានឃើញហើយទើសភ្នែក និងរិះគន់ឡើងចាស់ដៃ ដោយសារក្រុមឈ្មួញដឹកដី ដឹកថ្ម និង ឡានធំៗ ជិះបុកមិនស្វាងសោះ។
បើតាមមន្រ្តីក្រសួងសាធារណការនិងដឹកជញ្ជូន បញ្ជាក់ប្រាប់សារព័ត៌មានក្នុងស្រុកបានឱ្យដឹងថា ក្រោយពីដឹងដំណឹងខាងលើ ខាងទីភ្នាក់ងារជប៉ុន JICA បានដឹកនាំកម្លាំងទៅចុះត្រួតពិនិត្យកន្លែងដែលរងការខូចខាត និងគ្រោងជួសជុលឲ្យស្អាតឡើងវិញក្នុងពេលដ៏ឆាប់ខាងមុខ កុំឲ្យពលរដ្ឋកម្ពុជាឃើញទើសភ្នែក
និងមានការអន់ចិត្តឃើញស្ពានតម្លៃ ១០០លានដុល្លារ ដែលជប៉ុនខំជួយសាងសង់យ៉ាងស្អាត ទៅជាខូចខាតបាត់បង់សោភ័ណភាពបែបនេះ។នៅស្ពាននេះ មានកន្លែងខូចខាតដល់ទៅ៣កន្លែងដោយគ្រោះថ្នាក់ ហើយប្រជាជនដែលធ្វើដំណើរតាមផ្លូវនេះ មើលហើយទើសភ្នែកជាខ្លាំង ត្បិតអីស្ពាននេះពិតជាស្រស់ស្អាត មិនគួរណាមានកន្លែងបែកបាក់យ៉ាងនេះ ហើយនៅមិនទាន់ជួសជុលនោះទេ។
បើតាមលោក អ៊ុន សុធា ប្រធានមន្ទីរសាធារណៈការ និង ដឹកជញ្ជូន ខេត្តព្រៃវែង បញ្ជាក់ឱ្យថា ស្ពានអ្នកលឿង គ្រប់គ្រងដោយនាយកកដ្ឋានផ្លូវល្បឿនលឿន របស់ក្រសួងសាធារណៈការ និងដឹកជញ្ចូន រីឯខាងការងារបច្ចេកទេសខាងភាគី ជប៉ុន ជាអ្នកមើលការខុសត្រូវ។ ស្ពាននេះ ប្រើគ្រឿងបន្លាស់សុទ្ធតែនាំពីជប៉ុនមក
ដូច្នេះត្រូវប្រើពេលយូរទើបដឹកដល់កម្ពុជា ខណៈដែលរឿងកាន់តែធ្វើឱ្យយូរទៀតនោះ គឺអ្នកបង្កក៏មិនបានចូលខ្លួនដោះស្រាយដែរ ព្រោះសំណងនៃការបុកស្ពាននេះក៏ច្រើនខ្លាំងផងដែរ៕
