ជប៉ុន៖ អាជ្ញាធរបានឱ្យដឹងថា ក្មេង ៨នាក់ក្នុងចំណោម មនុស្សយ៉ាងហោចណាស់ ១៥នាក់ បានរងរបួសបន្ទាប់ពីបុរសវ័យកណ្ដាលម្នាក់ដេញចាក់មនុស្សម្នានៅក្នុងឧទ្យានមួយនៃទីក្រុង Kawasaki ប្រទេសជប៉ុន នៅថ្ងៃអង្គារនេះ។
យោងតាមអ្នកនាំពាក្យអគ្គនាយកដ្ឋានអគ្គីភ័យនៃទីក្រុង លោក Akira Tanaka ឲ្យដឹងថា ពួកគេបានទទួលទូរស័ព្ទសង្គ្រោះបន្ទាន់នៅវេលាម៉ោង ៧:៤៤នាទីព្រឹកម៉ោងនៅក្រុងតូក្យូ ក្រោយពេលដែលមនុស្សជាច្រើននាក់ត្រូវបានរងរបួស ដោយសារគេចាក់។ យោងតាមទូរទស្សន៍ជប៉ុន NHK ក្នុងចំណោមអ្នករងគ្រោះទាំងអស់ ក្នុងនោះមាន៣នាក់រងរបួសធ្ងន់ដោយមានទាំងសិស្សសាលាបឋមផងដែរ។ យោងតាមទូរទស្សន៍ជប៉ុន NHK បានបន្ថែមទៀតថា ក្មេងៗ ៨នាក់ និងមនុស្សពេញវ័យ ៧នាក់ ត្រូវបានទទួលការព្យាបាលភ្លាមៗផងដែរ។
ក្រោយពេលកើតហេតុ ប៉ូលិសបានធ្វើការឃាត់ខ្លួនបុរសវ័យកណ្ដាលម្នាក់នេះ អាយុខ្ទង់ ៤០-៥០ឆ្នាំ ហើយមានរបួសធ្ងន់ផងដែរ ប៉ុន្តែចំពោះមូលហេតុដែលបណ្ដាលឲ្យជនល្មើសធ្វើការដេញចាក់មនុស្សពេញទីក្រុង មិនទាន់ត្រូវបានគេដឹងនៅឡើយទេ។
គួរបញ្ជាក់ផងដែរថា ទីក្រុង Kawasaki មានចម្ងាយប្រហែល ២១គីឡូម៉ែត្រពីទីក្រុងតូក្យូ៕ ប្រភព៖ CNN
