ភ្នំពេញ៖ កាលពីវេលាម៉ោង៤ និង៣០នាទីល្ងាច ថ្ងៃទី២៨ ខែឧសភា ឆ្នាំ២០១៩ម្សិលមិញនេះ នៅតាមផ្លូវបេតុងលេខ២៣ ស្ថិតនៅក្នុងភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ កម្លាំងនគរបាលខណ្ឌដង្កោ ធ្វើការឃាត់ខ្លួនក្មេងទំនើងជាសិស្សសាលាចំនួន១០នាក់ ដែលបង្ហោះម៉ូតូ និងដេញវាយគ្នាពេលផ្លូវ យ៉ាងអាណាធិបតេយ្យ ។
ប្រភពពីកន្លែងកើតហេតុបានឲ្យដឹងថា កាលពីថ្ងៃទី២៧ ខែឧសភា ឆ្នាំ២០១៩ ក្រុមក្មេងស្ទាវ២ក្រុមនេះ បានជិះម៉ូតូដេញវាយ កាប់ចាក់គ្នា បង្ហោះម៉ូតូបង្កអសន្តិសុខ ធ្វើឲ្យប្រជាពលរដ្ឋដែលរស់នៅក្នុងបុរី មានការភ្ញាក់ផ្អើល ហើយថែមទាំងមានអ្នករងរបួសថែមទៀតផង ហើយក៏នាំរត់គេចខ្លួនបាត់អស់ទៅ។ លុះដល់ថ្ងៃទី២៨ ខែឧសភា វេលាម៉ោង៤ និង៣០នាទីរសៀលម្សិលមិញនេះ
ស្រាប់តែលេចមុខក្រុមក្មេងទំនើង២ក្រុម មានគ្នា១០នាក់ បានជិះម៉ូតូបង្ហោះ ឌឺដងគ្នា ផ្អើលដល់បងប្អូនប្រជាពលរដ្ឋម្តងទៀត និងរាយការណ៍ជូនសមត្ថកិច្ច ចុះមកអន្តរាគមន៍ឃាត់ខ្លួនបាន១០នាក់ ព្រមទាំងដកហូតបានម៉ូតូ៦គ្រឿងផងដែរ ហើយបញ្ជូនមកធ្វើការសាកសួរ និងអប់រំតាមផ្លូវច្បាប់ រួចអនុញ្ញាតឲ្យត្រឡប់ទៅផ្ទះវិញផងដែរ៕
