ហុងកុង៖ ប្រិយមិត្តជាច្រើន ច្បាស់ជាស្គាល់តារាសម្តែងហុងកុងជើងចាស់ម្នាក់នេះហើយ ដែលមានឈ្មោះ Lee Siu Kei ពេលនេះគាត់បានលាចាកលោកហើយ កាលពីពេលថ្ងៃទី២ ខែមិថុនា ឆ្នាំ២០១៩ ក្នុងវ័យ ៦៩ឆ្នាំ ដោយសារតែជំងឺមហារីកថ្លើម និងជំងឺច្រើនមុខទៀតនៅក្នុងខ្លួន ។
គួរឱ្យដឹងផងដែរថា លោក Lee បានកសាងកេរ្ត៍ឈ្មោះ រហូតក្លាយជាតួល្បីមួយរូប តាមរយៈការសម្តែងជាតួបងធំ បងតូច ក្នុងរឿងហុងកុងល្បីៗជាច្រើន ជាពិសេសលោកក៏ធ្លាប់មានវត្តមានសម្ដែងក្នុងរឿងជាមួយនឹងលោក Stephen Chow ហៅទិនហ្វីផងដែរ ដែលសុទ្ធតែជារឿងល្បីៗដូចជារឿង ចុងភៅទេវតា មេធាវីទេវតា និង រឿងផ្សេងៗទៀត។ ។លោក Lee បានចាប់យកអាជីពសម្តែងរហូតដល់អាយុជាង ៦០ឆ្នាំ
ហើយទើបតែបាត់មុខលោកពីវិស័យសិល្បៈនាឆ្នាំ ២០១៥ ប៉ុណ្ណោះ ដោយសារ លោកមានជំងឺពាក់ព័ន្ធនឹងខួរក្បាល។ ក្រោយមកទៀត នៅក្នុងឆ្នាំ២០១៨ លោក Lee ក៏ត្រូវបានគ្រូពេទ្យពិនិត្យឃើញថា មានជំងឺមហារីកថ្លើម ចាប់តាំងពីពេលនោះមក រាងកាយលោកកាន់តែចុះខ្សោយទ្រុឌទ្រោម បើទោះបីជាស្ថិតក្រោមការមើលថែ និងព្យាបាលជាប្រចាំក្តី ។ក្រុមគ្រួសារលោក បញ្ជាក់តាមសារព័ត៌មានឱ្យដឹងថា ការបាត់បង់លោក Lee
គឺជាការបាត់បង់ដ៏ធំធេងមួយ ព្រោះលោកជាមនុស្សដ៏ល្អម្នាក់ តែមរណភាពនេះ ក៏ជារឿងមួយល្អដែរ ព្រោះថាគាត់នឹងឈប់ឈឺចាប់តទៅទៀត និងអាចសម្រាកដោយសុខស្រួលហើយ ។បច្ចុប្បន្នក្រុមគ្រួសារលោក បានរៀបចំពិធីបុណ្យសពតាមប្រពៃណី ដែលមានការចូលរួមរំលែកទុក្ខពីសំណាក់មហាជន និងតារាជាច្រើនផងដែរ។
គួរបញ្ជាក់ផងដែរ ក្នុងរយៈពេលដែលលោក Lee ស្ថិតក្នុងការព្យាបាលនៅមន្ទីរពេទ្យ តារាសម្ដែងដ៏ល្បីលោក Luis Koo បានធ្វើរកមូលនិធិដើម្បីជួយដល់ចំណាយលើការព្យាបាលលោក Lee ហើយតែងតែសួរពីអាការៈរបស់លោក Lee ជាប្រចាំផងដែរ៕ ប្រភព៖ ហ្វេសប៊ុក
