អ៊ីតាលី៖ កាលពីវេលាម៉ោង ប្រហែល ៨ កន្លះព្រឹក ថ្ងៃអាទិត្យ ទី ០២ មិថុនា ២០១៩កន្លងទៅនេះ នាវាកម្សាន្តមួយគ្រឿង បានបាត់បង់ម្ចាស់ការ រួចបុករះចូលផែ និងទូកទេសចរណ៍មួយគ្រឿងទៀត នៅក្បែរកំពង់ផែក្រុង Venice ប្រទេសអ៊ីតាលី បណ្តាលឱ្យមនុស្សចំនួន ៥នាក់រងរបួស ។ ក្រោយការប៉ះទង្គិចគ្នានេះ បង្កឱ្យមានការអំពាវនាវថ្មី ដើម្បីរឹតបន្តឹងនាវាកម្សាន្ត នៅក្នុងទីក្រុងដ៏ល្បីល្បាញខាងលើ ។
គេឃើញថា នៅមុនពេលកើតហេតុ មាននាវាកម្សាន្ត MSC Opera មិនអាចបញ្ឈប់នាវាបានឡើយ ដោយបាត់បង់ម្ចាស់ការ ហើយបានស៊ីផ្លេផ្តល់ដំណឹង ខណៈបុករះចូលទៅកំពង់ផែ និងបានបុកទូកដែលចតក្បែរនោះទៀតផង បណ្តាលឱ្យមនុស្សម្នាជាច្រើនភ័យស្លន់ស្លោរ រត់ចែកជើងគ្នា ។
បើយោងតាមសម្តីរបស់មន្ត្រី នៅក្នុងតំបន់បានប្រាប់ឱ្យដឹងថា អ្នករងគ្រោះទាំងអស់មាន ៥នាក់ ដែលសុទ្ធតែជាមនុស្សស្រី ស្ថិតនៅលើទូកទេសចរណ៍ ។ ក្នុងនោះដែរ ស្រ្តីរងគ្រោះម្នាក់ ត្រូវបានអនុញ្ញាតឱ្យចាកចេញពីមន្ទីរពេទ្យភ្លាមៗ ខណៈ ៤នាក់ផ្សេងទៀត ត្រូវនៅបន្តសម្រាកព្យាបាល ៕
ចង់ជ្រាបកាន់តែច្បាស់ សូមទស្សនាវីដេអូខាងក្រោមនេះ៖
