ព្រះសីហនុ៖ រសៀលថ្ងៃទី៩ ខែកក្កដា ឆ្នាំ២០១៩ ម្សិលមិញនេះ ក្រោយពីឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ បានសរសេរសំណេរមួយនៅលើហ្វេសប៊ុករបស់លោកនៅនេះថា៖
‹‹ក្រោយការប្រជុំពិភាក្សាអំពីការប្រមូលកាកសំណល់កាលពីព្រឹក នៅសាលាក្រុងព្រះសីហនុ យេីងបានកំណត់យកថ្ងៃទី១៣ ខែកក្កដា ឆ្នាំ២០១៩ ខាងមុខ បេីកយុទ្ធនាការប្រមូលកាកសំណល់ចេញពីខេត្តព្រះសីហនុ។ សូមបងប្អូនប្រជាពលរដ្ឋចូលរួមសម្អាតអនាម័យបរិស្ថាន វេចខ្ចប់ និងញែកសំរាមឱ្យបានត្រឹមត្រូវតាមប្រភេទសំរាម››។
ឯកឧត្ដម គួច ចំរើន អភិបាលខេត្តព្រះសីហនុ បានអំពាវនាវដល់ មន្ត្រីរាជការ កងកម្លាំងប្រដាប់អាវុធ រួមទាំបងប្អូនប្រជាពលរដ្ឋ ចូលរួមយុទ្ធនាការប្រមូលសំរាមនិងកាកសំណល់ចេញពីក្រុងព្រះសីហនុ នៅថ្ងៃទី ១៣ ខែកក្កដា ខាងមុខនេះទាំងអស់គ្នាផងដែរ។
គួរបញ្ជាក់ផងដែរ បច្ចុប្បន្ននេះ ក្នុងខេត្តព្រះសីហនុ សំរាមប្រចាំថ្ងៃមានប្រមាណ ៧០០ តោន ដែលចំនួននេះមានការកើនឡើងដោយសារតែកំណើនប្រជាជន កំណើនវិនិយោគ និងការផ្លាស់ប្តូរឥរិយាបថរបស់ប្រជាពលរដ្ឋលើការវេចខ្ចប់ទំនិញ៕
