ខេត្តព្រះសីហនុ៖ វេលាម៉ោងប្រមាណ ១០ៈ៣០នាទីព្រឹក ថ្ងៃទី១១ ខែកក្កដា ឆ្នាំ២០១៩ នេះ សមត្ថកិច្ចគយចល័ត នៃអគ្គនាយកដ្ឋានគយ និងរដ្ឋាករខេត្តព្រះសីហនុ ចូលរួមពីកម្លាំងកងរាជអាវុធហត្ថ បានចុះបង្ក្រាបទីតាំងឃ្លាំងស្តុកម៉ាសុីនភ្លេីង តាមដីកាបង្គាប់អោយឆែកឆេរលំនៅដ្ឋាន ឫរុករកវត្ថុតាងរបស់ប្រធានសាលាដំបូងខេត្តព្រះសីហនុ។ ក្នុងប្រតិបត្តិការឆែកឆេរនេះ ដឹកនាំដោយលោក លឹម ប៊ុនហេង ព្រះរាអាជ្ញារង នៃអយ្យការអមសាលាដំបូងខេត្តព្រះសីហនុ បានចុះទៅដល់ឃ្លាំងស្តុកម៉ាសុីនភ្លេីង ដែលមានម្ចាស់ជាជនជាតិចិន ចំនួន២កន្លែង៖
- ឃ្លាំងឈ្មោះ ហ្វូលីសុឺថឺ មានទីតាំងនៅផ្លូវជាតិលេខ ៤ ភូមិ ១ សង្កាត់លេខ១ ក្រុងព្រះសីហនុ ទល់មុខរោងចក្រស្រាបៀរក្រោន
- ឃ្លាំងឈ្មោះ គ្រឿងបន្លាស់ ឡុង សឹង មានទីតាំងនៅផ្លូវជាតិលេខ៤ ក្នុងភូមិ១ សង្កាត់លេខ១ ក្រុងព្រះសីហនុ ទល់មុខរោងចក្រស្រាបៀរក្រោន ឆៀងខាងលិច
ករណីនេះសមត្ថកិច្ចគយបានដកហូតយកម៉ាសុីនភ្លើងតូចធំទាំងអស់ជិត ៧០គ្រឿង ដើម្បីយកទៅរក្សាទុកជាបណ្តោះអាសន្ន និងតម្រូវអោយម្ចាស់ចូលខ្លួនទៅបង្ហាញឯកសារបង់ពន្ធ។ ក្នុងករណីបើគ្មានឯកសារត្រឹមត្រូវ នឹងតម្រូវឱ្យម្ចាស់បង់ពន្ធជូនរដ្ឋ ជាមួយនឹងការផាកពិន័យតាមនិតិវិធីច្បាប់ផងដែរ ។
បច្ចុប្បន្ន កំលាំងជំនាញគយ រៀបចំស្ទូចយកម៉ាសុីនភ្លេីងទាំងនោះយកទៅរក្សាទុកនៅការិយាល័យគយ និងរដ្ឋាករស្ទឹងហាវដេីម្បីបន្តនិតិវិធីច្បាប់ ៕
