អ្នកនាំពាក្យរដ្ឋាភិបាល អាល្លឺម៉ង់ មិនបានផ្តល់ព័ត៌មានលម្អិតអំពីពេលវេលា និងទំហំនៃការចែកចាយថ្នាំ បាយអូតិច នេះទេ ជាវ៉ាក់សាំងបរទេសដំបូងគេដែលត្រូវបញ្ជូនទៅប្រទេសចិន ។
បុគ្គលនេះបាននិយាយថា ទីក្រុងប៊ែកឡាំងកំពុងធ្វើយុទ្ធនាការដើម្បីអនុញ្ញាតឱ្យជនបរទេសដែលមិនមែនជាពលរដ្ឋអាល្លឺម៉ង់ ប្រហែល ២០.០០០ នាក់អាចទទួលបានវ៉ាក់សាំងនេះប្រសិនបើមានតម្រូវការ ។
នៅក្នុងលិខិតមួយទៅកាន់ពលរដ្ឋអាល្លឺម៉ង់នៅក្នុងប្រទេសចិនដីគោក រដ្ឋាភិបាលបាននិយាយថា ខ្លួននឹងផ្តល់វ៉ាក់សាំងជាមូលដ្ឋានដោយមិនគិតថ្លៃ និងបញ្ជាក់ឡើងវិញនូវអ្វីដែលបានអនុម័តរួចហើយសម្រាប់ការប្រើប្រាស់នៅក្នុងសហភាពអឺរ៉ុប (EU) ដល់មនុស្សដែលមានអាយុលើសពី ១២ ឆ្នាំ។
ការផ្តល់នេះមិនអនុវត្តចំពោះសមាជិកគ្រួសារដែលមានសញ្ជាតិផ្សេងទៀតទេ ខណៈដែលផែនការសម្រាប់កុមារអាយុក្រោម ១២ ឆ្នាំអាចត្រូវបានអនុវត្តនៅពេលក្រោយ។
យោងតាមប្រភពដដែល វ៉ាក់សាំងជាច្រើននឹងត្រូវបញ្ជូនទៅក្រុមហ៊ុនអាល្លឺម៉ង់ក្នុងប្រទេសចិន ក៏ដូចជាទីតាំងស្ថានទូតផងដែរ។ រដ្ឋាភិបាលសហភាពអឺរ៉ុបផ្សេងទៀតក៏កំពុងចរចាផងដែរ ដើម្បីជួយពលរដ្ឋដែលមានសញ្ជាតិផ្សេងទៀតទទួលបានវ៉ាក់សាំង។
ជាលទ្ធផល ប្រទេសចិននឹងត្រូវការការយល់ព្រម ដើម្បីពង្រីកលទ្ធភាពទទួលបានវ៉ាក់សាំងលើសពីពលរដ្ឋអាល្លឺម៉ង់។ ជាការតបស្នងវិញ ពលរដ្ឋចិននៅអឺរ៉ុបអាចទទួលបានវ៉ាក់សាំង ស៊ីណូវ៉ាក់ ។
កាលពីដើមខែនេះ មានសេចក្តីរាយការណ៍ថា ក្រសួងសុខាភិបាលអាឡឺម៉ង់បានអនុញ្ញាតឲ្យនាំចូលវ៉ាក់សាំង ស៊ីណូវ៉ាក់ ដើម្បីផ្គត់ផ្គង់ដល់ពលរដ្ឋចិន។ ទីភ្នាក់ងារឱសថអឺរ៉ុបមិនទាន់បានអនុម័តវ៉ាក់សាំងនេះនៅឡើយទេ ប៉ុន្តែអង្គការសុខភាពពិភពលោក (WHO) បានយល់ព្រម។
រហូតមកដល់ពេលនេះ ទីក្រុងប៉េកាំងបានប្រើប្រាស់តែវ៉ាក់សាំងក្នុងស្រុកប៉ុណ្ណោះ ហើយចំនួនប្រាំបួនត្រូវបានអនុញ្ញាតឲ្យប្រើប្រាស់។
ព័ត៌មាននៃការដឹកជញ្ជូននេះកើតឡើងបន្ទាប់ពីកិច្ចព្រមព្រៀងដែលបានធ្វើឡើងក្នុងអំឡុងពេលដំណើរទស្សនកិច្ចរបស់នាយករដ្ឋមន្ត្រី Olaf Scholz ទៅកាន់ប្រទេសចិនកាលពីខែមុន។ រ៉យទ័រ បានវាយតម្លៃថាការអនុញ្ញាតឱ្យជនជាតិអាល្លឺម៉ង់ចូលទៅកាន់វ៉ាក់សាំងលោកខាងលិចគឺជាកាយវិការដែលឆ្លុះបញ្ចាំងពីការខិតខំប្រឹងប្រែងរបស់ទីក្រុងប៉េកាំងក្នុងការពង្រឹងទំនាក់ទំនងជាមួយសេដ្ឋកិច្ចធំបំផុតរបស់សហភាពអឺរ៉ុប៕ ប្រភពពី៖ Bloomberg
